Aktivitetssenter i gamle fabrikklokale

Produksjonsanlegget til Devoldfabrikken var stort, og eigarane har tenkt utradisjonelt når dei fann ny bruk til arealet. Dei ønskja å tilby funksjonar som kunne kome både lokalmiljøet og besøkjande til gode. Det resulterte i Kraftverket aktivitetspark, som har eit variert tilbod for store og små.

Devoldfabrikken i Langevåg blei reist i 1869, og produserte vevde og strikka ullvarer. Her hadde ein tilgang til vasskraft for drifta. I 1988 blei produksjonen flytta ut av landet, og fabrikken blei ståande tom. I dag er området eit industrielt kulturminne. Eigar kjøpte fabrikkområdet i 2006, og har sidan utvikla det for handel- og næringsverksemd.

Aktivitetsparken var tidlegare etablert i andre lokale, men blei kjøpt og flytta til Devoldfabrikken.

Utviklinga av det store fabrikkområdet har gått føre seg i fleire år. I samband med at aktivitetsparken blei flytta til Devoldfabrikken, blei eit større areal sett i stand og aktivisert. Apparata i aktivitetsparken er frittståande modular plassert på eit mjukt belegg. Difor har det ikkje vore nødvendig med større inngrep for å tilpasse romma til ny bruk.

Bruk og ombruk er gode føresetnadar for vern av ein bygning. Store industrianlegg er sjeldan tilpassa dagens tekniske krav, og kan difor være kostbare og utfordrande å gjenbruke. Eksempelet syner kreativ bruk av krevjande industribygg. Aktivitetsparken krev få tilpassingar. Den nye bruken skapar liv i tomme areal, noko som gjev verdi til nærmiljøet.