Restauranten Bien var opphaveleg eit apotek

Bien er ein viktig del av kulturmiljøet på Danmarksplass. Apoteket hadde eit svært godt bevart funksjonalistisk interiør. No er lokalet gjort om til restaurant, med skånsame tillegg og utan store inngrep i det freda interiøret.

På Danmarksplass i Bergen ligg eit anlegg frå 1936 som er teikna av bergensarkitekten Ole Landmark. Murgardane på 4-5 etasjar inneheld butikkar, kontor og bustadar. Apotek Bien blei etablert i 1939. Interiøret er teikna av Fredrik Arnesen og Arthur Darre Kaarbø i funksjonalistisk stil. I 1993 blei interiøret freda. Lokalet var i bruk som apotek fram til 2001, og etter nokre år som kiosk blei det i 2006 rehabilitert og gjort om til Bien bar og restaurant.

Apoteket Bien utgjer eit karakteristisk eksempel på eit funksjonalistisk butikkinteriør. Samanstillinga av rette og boga linjer, samt bruk av geometriske former er typisk for formspråket i funksjonalismen. Dette kjem tydeleg fram både på fasaden, i planløysinga til interiøret og i møblane. Det opphavelege interiøret er utført i flammebjørk der skranken og arbeidsbenkane er kledt med svart linoleum. Materialvalet, med bruk av stålrøyr og kontrast mellom treverket og dei svarte flatane, er også karakteristisk for perioden.

Utfordringa i lokalet var å få på plass ein ny funksjon som var veldig annleis enn den opphavelege funksjonen som interiøret blei bygd for. Intensjonen var heile tida å ta var på mest mogleg, samtidig som det også var behov for å flytte og bygge om noko av iventaret.

Den opphavlege bruken av apoteket var delt i to soner ved hjelp av ein lang disk. Dei ansatte stod på den eine sida og dei besøkande på den andre. For å gjere heile lokalet tilgjengeleg har ein utvida den eksisterande åpninga i ekspedisjonsdisken og etablert ein bar inst i lokalet. Bardisken var tidlegare reseptdisk. Den er no tilpassa med eit nytt overstykke i metall. Gjennom enkle grep har ein klart å tilpasse dei plassbygde møblane til den nye bruken.

Endringar i verdifulle og sårbare interiør må vurderast nøye slik at viktige element eller opplevingsverdien i interiøret ikkje går tapt. Restaurant Bien viser at ny bruk også kan tilpassast i heilskaplege miljø. Ved å bruke det eksisterande interiøret som ein ressurs, og foredle det i staden for å skifte det ut, kan vi tilføre ein verdi i staden for å svekke han. Ombygginga av den opphavelege disken til bar er eit godt eksempel på dette.