Restaurant i kommandantbustad på freda festning

På Kongsvinger festning er det no eit historisk hotel med restaurant i kommandantbustaden. For å mogleggjere moderne restaurantdrift i det freda bygget er det gjort smarte grep som skånar det mest sårbare interiøret for krevjande installasjonar.

Kongsvinger festning er eit godt bevart festningsanlegg med høg historisk verdi. Det freda anlegget ligg strategisk til på ei høgde sentralt i Kongsvinger med godt utsyn over byen og mot Sverige. Anlegget innanfor festningsmurane består i dag av 10 bygg. Alle bygningane er oppført i mur, i hovudsak granitt- og naturstein, bortsett frå Kommandantbustaden frå 1683 som er eit bindingsverksbygg kledd i panel. Bindingsverkskonstruksjonar dukkar sjeldan opp utanfor Oslo og var svært uvanleg i Kongsvingerdistriktet på denne tida.

For å møte dagens tekniske krav som stillast til serveringsstader var det nødvendig å gjere omfattande tilpassingstiltak i bygningen. Krevjande funksjonar blei plassert i sekundærareal, for å skåne praktsalane så mykje som mogleg. Restaurantkjøkkenet blei plassert i eit lite tilbygg, medan kjølerom og lager blei plassert i kjellaren. I det kvelva rommet i kjellaren har det også kome inn ein vinkjellar.

Sjølv om bygningen har gått gjennom mange endringar sidan byggeåret er den opphavelege strukturen i stor grad bevart. Den eksisterande romløysninga fungerte godt til ny restaurantbruk. For å støtte restaurantdrifta er det etablert eit lite anretningsrom som ikkje har ført til store endringar i det freda interiøret. I samband med tilpassinga til ny bruk er alle overflatar satt i stand og salane har fått ei teknisk oppgradering med nytt elektrisk anlegg og brannsikring. Ved å legge dei tekniske føringane på loftet blei sprinkleranlegget lite synleg i dei freda interiøra og berre dysene er synlege.

Det er utfordrande å plassere eit restaurantkjøkken i sårbare rom og det er difor viktig at ein vurderer bygget sine areal nøye for å unngå store endringar og inngrep.