Historisk fyr har blitt hotellrom

Molja fyr er eit lite ombruksprosjekt med særpreg. Det gamle fyret ligg synleg til ved innseglinga til Ålesund. Interiøret er tilpassa bygget sin nye funksjon som eksklusivt hotellrom knytt til Brosundet Hotel.

Molja er det sunnmørske ordet for Molo. Fyret er oppført i 1858, og hadde tidlegare eit lite vaktrom knytt til sjølve lykta. Fyret blei gjort om til fyrlykt og blei ubemanna allereie i 1889. Hotel Brosundet har inngått ein leigeavtale på 99 år med Ålesund kommune og Kystverket.

Den opphavelege bruken av fyret var ikkje lenger aktuell og bygget hadde lenge stått tomt. Fyret hadde ein del inventar som blei fjerna for å mogleggjere den nye bruken, men inventaret har blitt lagra slik at fyret kan tilbakeførast dersom det blir aktuelt i framtida. Arealet i fyret er knapt, så for å få plass til nødvendige funksjonar har ein bygd eit nytt og spesialtilpassa interiør. Løysinga blei eit lite bad i underetasjen og sengeplassar i overetasjen. Det nye interiøret er utført i tradisjonelle materialar og malt med linoljemaling.

Nye og overraskande funksjonar i historiske bygg gjev spanande opplevingar. Ved hjelp av ein god arkitekt og snikkar kan ein få til spesialtilpassa interiør, sjølv på små og utfordrande areal.

Forfattar: Frida McIntosh, Riksantikvaren