Historisk butikk får nytt liv gjennom flytting av trapp

Det gamle butikklokalet i den såkalte Bersetbua er interiørfreda. Butikklokalet hadde lenge stått tomt fordi lokalet var lite og vanskeleg å drive. Det var ønskjeleg å knyte lokalet til resten av bygget og den øvrige drifta. I samband med rehabiliteringa av Hotel Brosundet blei trappa som tidlegare gjekk opp til overetasjen snudd slik at butikken no har kontakt med restauranten og hotelldrifta i underetasjen. Løysinga har gjort den vesle butikken til ein integrert del av den daglege drifta på hotellet.

Det freda pakkhuset Bersetbua ligg i Apotekergata 5, og blei oppført i 1905, teikna av arkitekt Jens Zetlitz Monrad Kielland. Som andre pakkhus langs Brosundet var det opprinneleg ein kombinasjon av forretningslokaler mot Apotekergata og varelager mot sjøsida. I 2016 blei det kjøpt av Hotel Brosundet, som allereie dreiv i nabobygget, eit pakkhus frå 1904, oppført etter bybrannen.

Det var viktig å halde det historiske interiøret som det var, samstundes var ein avhengig av å legge til rette for nokre nye løysingar. Løysinga blei å fjerne trappa som gjekk opp, og erstatta ho med ei trapp som leia ned til underetasjen. Den nye trappa har fått ein form som sklir godt inn i det historiske interiøret, samstundes som den ivaretek dagens tekniske krav til rømming.
Butikklokalet har framleis dei store vindauga ut mot gata. Ved å sjå det opphavelege interiøret i lokalet blir Ålesund styrka som historisk stad og gjer det interessant å bevege seg i området.

Ved å koble ulike verksemdsfunksjonar saman kan ein skape aktivitet i lokaler der ein elles ikkje har moglegheit til å drifte dei på same måte som tidlegare. Opninga av den vesle butikken har også positive konsekvensar for bylivet utanfor.